![](https://static.wixstatic.com/media/33c7c3_921e6564d010615b052a047d7d084865.jpg/v1/fill/w_980,h_652,al_c,q_85,usm_0.66_1.00_0.01,enc_auto/33c7c3_921e6564d010615b052a047d7d084865.jpg)
![](https://static.wixstatic.com/media/33c7c3_7e844a9e909bbd6f4fc0edba36451f01.jpg/v1/fill/w_980,h_521,al_c,q_85,usm_0.66_1.00_0.01,enc_auto/33c7c3_7e844a9e909bbd6f4fc0edba36451f01.jpg)
![](https://static.wixstatic.com/media/33c7c3_7d52ea7028685c545aaa42495f3e0c68.jpg/v1/fill/w_980,h_735,al_c,q_85,usm_0.66_1.00_0.01,enc_auto/33c7c3_7d52ea7028685c545aaa42495f3e0c68.jpg)
![](https://static.wixstatic.com/media/33c7c3_921e6564d010615b052a047d7d084865.jpg/v1/fill/w_980,h_652,al_c,q_85,usm_0.66_1.00_0.01,enc_auto/33c7c3_921e6564d010615b052a047d7d084865.jpg)
![](https://static.wixstatic.com/media/33c7c3_3265fa489543c4ac345a8ad185953b14.png/v1/fill/w_7,h_47,al_c,lg_1,q_85,enc_auto/33c7c3_3265fa489543c4ac345a8ad185953b14.png)
Բժշկական վերապատրաստում
ՀԱՆ-ի կողմից մատուցվող բժշկական ուսուցումը և վերապատրաստումը հնարավորություն է տալիս Հայաստանի առաջնային, երկրորդային և երրորդային մակարդակների բուժաշխատողներին զարգացնելու ակնաբուժության մասին գիտելիքներն ու հմտությունները, ինչը կապահովի բարձրորակ ակնային ծառայությունների մատուցումը բնակչությանը Հայաստանի ամբողջ տարածքում: ՀԱՆ-ը բազմաթիվ մասնագիտական դասընթացներ է կազմակերպել Հայաստանի մարզային ակնաբույժների ու
ընտանեկան բժիշկների համար: Այդ գործում նրա հիմնական գործընկերներն են ԱՄՆ ՄԶԳ «Առողջության առաջնային պահպանման բարեփոխումների ծրագիրը» (PHCR) և «Կրթությամբ զարգացման ակադեմիան» (AED):
Առ այսօր ՀԱՆ-ը Հայաստանի մարզերում և Երևանում վերապատրաստել է ավելի քան 2000 մասնագետի: Դասընթացների ժամանակ կիրառվում են ՀԱՆ-ի հեղինակած «Աչքի հիվանդություններ» և «Ակնաբուժության ընտրանի» ուսումնական ձեռնարկները, որոնք Հայաստանի անկախությունից ի վեր հրատարակված առաջին հայերեն ակնաբուժության դասագրքերն են:
![](https://static.wixstatic.com/media/33c7c3_cee55efc9ce0ce367b43dbec7bbaed1e.png/v1/fill/w_975,h_157,al_c,lg_1,q_85,enc_auto/33c7c3_cee55efc9ce0ce367b43dbec7bbaed1e.png)
Հայկական ակնաբուժության նախագծի
(ՀԱՆ) առաքելությունն է կանխարգելել
ձեռքբերովի կուրությունը
Հայաստանում
Տեսական դասընթացներից զատ, Հայաստանի մարզերի ակնաբույժներն ու ընտանեկան բժիշկները հնարավորություն ունեն նաև ծանոթանալու ժամանակակից ակնաբուժական սարքավորումներին և զարգացնելու իրենց կիրառական հմտությունները: Նրանք մասնակցում են իրենց բնակավայրերում ՀԱՆ-ի բժշկական խմբերի կողմից իրականացվող ակնային զննումներին, ինչպես նաև ՀԱՆ-ի աչքի շարժական հիվանդանոցում կատարվող վիրահատություններին ու լազերային բուժումներին:
Կրթական նպատակով 2006 թ., ԱՄՆ ՄԶԳ ֆինանսավորմամբ, ՀԱՆ-ը Ս. Մալայանի անվան ակնաբուժական կենտրոնում բացել է նորագույն սարքավորումներով հագեցած Ուսուցման և ախտորոշման կենտրոնը, որտեղ բժիշկները և ուսանողները ծանոթանում են ակնաբուժության ոլորտի վերջին զարգացումներին և նվաճումներին: Այստեղ գործում է բարերար Հայկ Բաբիկյանի անվան
գրադարանը` ակնաբուժության վերաբերյալ գրականության ամենահարուստ հավաքածուներից մեկը Հայաստանում:
Նույն թվականին, «Փֆայզեր» ընկերության նվիրատվության շնորհիվ, ուսումնական կենտրոնը համալրել է վիրահատական հմտությունների զարգացման լաբորատորիան (Wet lab):